नारी नै नरहँदा संसार के चल्छ र !

छन्द कविता

आस्था केसी | 

#आस्था केसी | 

१
सृष्टिको लहराउँदो सलिलता संसारमा शोभित
आकाशैभरी चम्किने लहरमा झुल्किन्छ तारासित
कोखैभित्र चलायमान छ यसै सिर्जन्छ संसार यो
आमा हुन् नवयुग रङ्गिन कला नारीहरूकै छ यो ।

२
बन्छन् खुब सुरम्य सागर अनि अग्ला कतै टाकुरा
काखैमा सुकुमार चल्मल हुँदै आफ्नै हसिला भुरा
माटोमा मन–मोहिनी हृदयको मुना बनी हुर्किंदै
नाच्छन् फुर्फुर चौरीमा मनभरी नारीहरू नै सधैँ ।

३
नारीको नवसिर्जना सुर लिई घन्किन्छ सङ्गीतमा
नौलै बन्छ सधैँ कथा र कविता यै स्वच्छ संसारमा
साथैमा छ नयाँनयाँ लहर छन् स्वर्णिम आफ्नै कला
नारीकै नवजागृति सहज नै बन्छन् अनेकौँ तला ।

४
छोरी हुन् घरकी कतै मनभरी बन्छिन् बुहारी पनि
आमा हुन् नवसिर्जना जीवनकी आधार आफैँ बनी
पोखिन्छिन् अति कष्टसाथ दुनियाँ हुर्काउँदै सृष्टि यो
यस्ती मालिनीलाई कष्ट र पीडा भर्दिन्छ संसार यो ।

५
मैले जान्दिनँ नारी नै नरहँदा संसार के चल्छ र !
नारी नै नहुँदा सधैँ घरघरै बत्ती कहाँ वल्छ र !
आँखाको डिलमा छचल्किरहने पानी बनेकी चरी
नारी सिर्जनाकी धनी सुख सुधा भर्ने उनै हुन् परी ।

६
नारी सिर्जना पल्लवी जगतकी माता एवम् मोहिनी
नारी चन्द्रमा, अप्सरा गगनकी, तारा एवम् रोहिनी
नारी नै रहिनन् खुसी यदि भने खुसी कहाँ हुन्छ र ?
नारी क्रोधित भै गइन् यदि भने संसार रहन्छ र !

७
मान्छे हो, सोच है विचार गर है नारी दुखी छिन् किन ?
छोरी, बुहारी, श्रीमती र साथी ती रुन्छिन् किन छिनछिन ?
एउटा मर्म मनन् गरेर जनले नारीलाई बुझ है !
सत्य, न्याय, समानता र सुखले नारीलाई पुज है !

८
नारी हुन् ममता, दया र करुणा, सहिष्णुताकी घर
नारीलाई गर्‍यौ हेला यदि भने शान्ति कहाँ हुन्छ र !
छोरीलाई पढाइदेऊ बुबाआमा संसार जित्ने भए
उनको हात समातिदेऊ प्रेमले सम्मान खोज्ने भए ।

९
छोरी हो, सपना देख विजयको संसार तिम्रै हो यो
नानी हो, नभमा उड प्रकृतिको खुल्लै छ आकाश यो
आमा हो, उठ लौ हेर गगनमा उज्यालो लालित्य त्यो
साथी हो, नडराऊ नौका सहजै तार्नु छ समुद्रको ।

१०
तिम्रा पङ्ख फैलाऊ र उड अब कमजोर छैनौ तिमी
तिम्रा डर भगाऊ र निस्क अब एक्लै नि हैनौ तिमी
पुछ आँसु र हाँसिदेऊ अलिकति यात्रा सुनौलो गर
सपना पूरा गर र स्वच्छ मनले फर्केर आऊ घर ।

(११०औँ अन्तर्राष्ट्रिय श्रमिक महिला दिवसकाे अवसरमा नेपाल पत्रकार महासंघ महिला समितिकाे आयाेजनामा सम्पन्न महिला पत्रकार साँस्कृतिक महाेत्सवमा प्रथम स्थान हासिल गर्न सफल कविता ।)

https://shilapatra.com/detail/21997

प्रकाशित मिति: शनिबार, फागुन २४, २०७६  ०९:३०